ភ្នំពេញ៖ អគ្គស្នងការរង និងស្នងការដ្ឋាននគរបាលរាជធានីភ្នំពេញ លោកឧត្តមសេនីយ៍ឯក ស ថេត បានជំរុញឱ្យមន្ត្រីពាក់ព័ន្ធចុះទៅធ្វើអត្តសញ្ញាណបណ្ណសញ្ជាតិខ្មែរគំរូថ្មីដល់ផ្ទះពលរដ្ឋផ្ទាល់តែម្តង ដើម្បីពន្លឿនក្នុងការធ្វើអត្តសញ្ញាណបណ្ណដល់ពលរដ្ឋដែលគ្រប់អាយុ។

អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានបញ្ជាក់ប្រាប់អង្គភាពសារព័ត៌មាន EAC ថា លោកឧត្តមសេនីយ៍ឯក ស ថេត កាលពីព្រឹកថ្ងៃទី៣០ ខែវិច្ឆិកា បានដឹកនាំកិច្ចប្រជុំមួយ ដោយណែនាំឱ្យការិយាល័យអត្តសញ្ញាណបណ្ណសញ្ញាតខ្មែរ សហការជាមួយអធិការដ្ឋាននគរបាលខណ្ឌទាំង១៤ ដើម្បីរៀបចំកាលបរិច្ឆេទ និងកំណត់ភូមិសាស្ត្រណាដែលត្រូវចុះទៅធ្វើអត្តសញ្ញាណបណ្ណគំរូថ្មីដល់ពលរដ្ឋមានអាយុចាប់ពី១៥ឆ្នាំឡើងទៅ និងអ្នកដែលកាន់អត្តសញ្ញាណបណ្ណហូសសុពលភាព និងជិតហួសសុពលភាព។

អ្នកនាំពាក្យនិយាយថា៖ «ការិយាល័យជំនាញ និងនគរបាលខណ្ឌ ប៉ុស្តិ៍ នឹងសហការគ្នា ធ្វើការជាមួយបណ្តាមេឃុំទាំងអស់នៅភូមិសាស្ត្ររាជធានីភ្នំពេញ រៀបចំកម្មវិធី ផែនការ និងពេលវេលាច្បាស់លាស់ ដើម្បីប្រាប់ដល់ពលរដ្ឋ ចុះទៅភូមិណា កន្លែងណា ថ្ងៃណា ដើម្បីកុំឱ្យពលរដ្ឋខាតពេលរង់ចំា»។

បើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ យុទ្ធនាការចុះទៅធ្វើអត្តសញ្ញាណបណ្ណតាមភូមិ ឃុំ សង្កាត់នេះ ធ្វើឡើងបន្ថែមពីកម្មវិធីធ្វើអត្តសញ្ញាណបណ្ណតាមឃុំ ប៉ុស្តិ៍នគរបាលរដ្ឋបាលឃុំ សង្កាត់ ឬអធិការដ្ឋាននគរបាលក្រុង ស្រុក ខណ្ឌ។

លោក សាន សុខសីហា បានគូសបញ្ជាក់ថា យុទ្ធនាការនេះនឹងអនុវត្តជាបន្តបន្ទាប់ ដើម្បីផ្តល់ភាពងាយស្រួលដល់ពលរដ្ឋដែលគ្រប់អាយុមានអត្តសញ្ញាណបណ្ណសញ្ជាតិខ្មែរបានគ្រប់ៗគ្នា។ គូសបញ្ជាក់ថា ការធ្វើអត្តសញ្ញាណបណ្ណនេះត្រូវការពេលរយ:ពេល ៤៥ថ្ងៃ គិតចាប់ពីថ្ងៃបំពេញឯកសារ និងថតរូប៕